Ang Bayan, Lahi at Gunita: Pag-aaral sa Kasaysayan at Lipunang Pilipino ay gabay para sa mas masusing pag-aaral ng kasaysayan at lipunang Pilipino, na nakaangkla sa layunin ng Strengthened Senior High School Curriculum. Nilalayon nitong linangin ang kritikal na pag-iisip ng mga mag-aaral hinggil sa mga usaping panlipunan, kasaysayan, at identidad na patuloy na humuhubog sa ating kolektibong pagkatao bilang mga Pilipino. Ang aklat na ito ay hindi lamang isang kronolohikal na pagtatala ng mga pangyayari sa kasaysayan, kundi isang pagninilay sa kolektibong karanasan ng pakikibaka, kultura, at identidad. Binibigyang-diin dito ang kasaysayan bilang isang bukas at buhay na diskurso na kailangang suriin upang mailugar sa mas malalim na konteksto ang ugnayan ng kasaysayan at lipunan. Sa halip na sundan ang tradisyon ng kolonyal na historiograpiya na kadalasang tumatalima sa pananaw ng mga banyaga, ang aklat na ito ay isang radikal na pagtatangka sa pagbawi ng mga salaysay na matagal nang naisantabi, binura, o ipinagkait sa kolektibong kamalayan ng mga Pilipino.